ఇంటి వైద్యంతో ఆరోగ్య సమస్యలు మాయం..!

* అల్లం తింటే జీర్ణక్రియ వేగవంతం అవుతుంది. అల్లం కషాయంలో కొద్దిగా నిమ్మరసం ఉప్పు కలిపి ఇస్తే త్వరగా మార్పు కనిపిస్తుంది. గొంతు ఇన్‌ఫెక్షన్‌కి వేడిపాలల్లో పసుపు కలిపితే తాగితే మంచిది. పసుపులో యాంటీసెప్టిక్‌ గుణాలుంటాయి. ఇక వేడిపాలు, పసుపు సులువుగా నొప్పిని నివారిస్తాయి. దాంతో శరీరానికి సాంత్వన కలుగుతుంది.

* తలనొప్పిని దూరం చేసేందుకు నీళ్లు ఎక్కువగా తాగాలి. వేడి కారణంగా డిహైడ్రేషన్‌ సమస్య వచ్చి, తద్వారా తలనొప్పి బాధిస్తే మాత్రమే ఈ చిట్కా ఫలిస్తుంది. విద్యార్థులు పాలు కలపని కాఫీ తాగితే రాత్రిళ్లు నిద్ర రాదు. కెఫీన్‌ నిద్ర పట్టకుండా చేస్తుంది. పైగా దీని ప్రభావం 20 గంటల దాకా ఉంటుంది. అయితే అతిగా తాగితే మాత్రం అనర్థమే.

* దంతాల నొప్పికి లవంగాల నూనె భేషుగ్గా పనిచేస్తుంది. లవంగ నూనెలో దూదిని నానబెట్టకుండా, ఒకసారి ముంచి తీసేయాలి. ఆ తర్వాత నొప్పి అనిపించిన చోట ఉంచాలి. ఆ ప్రాంతంలో వేడినీటితో అద్దుకోవడం లేదా పుక్కిలించడం లాంటివి చేయకూడదు. ఎందుకంటే దాని తాలూకు ఇన్‌ఫెక్షన్‌ మిగిలిన ప్రాంతాలకూ వ్యాపిస్తుంది.

* శీతాకాలంలో ఆరోగ్యకరమైన ఆహారాన్ని ఎక్కువగా తీసుకోవాలి. శరీరాన్ని వెచ్చగా ఉంచేందుకు పోషకాహారం కాస్త ఎక్కువగా తీసుకోవాలనేది వాస్తవం. అయితే ఏదిపడితే అది కాకుండా వేడివేడి సూప్‌లు, విటమిన్‌ ఇ ఉండే ఆహారపదార్థాలు, ముఖ్యంగా నట్స్‌ను ఎక్కువగా తీసుకోవడం మంచిది.